Gaston Ternes

D'Bildungslandschaft zu Lëtzebuerg huet an de leschte Jore bedeitend Verännerunge matgemaach. Mat der Aféierung vu Kompetenzzentren, ëffentlechen Europaschoulen an der Alphabetiséierung op Franséisch reagéiert de Bildungssystem op déi ëmmer méi grouss gesellschaftlech Diversitéit. An dëser carte blanchedeelt de Gaston Ternes seng perséinlech Analys iwwer d'Konklusioune vum rezente Bildungsbericht.

Zwou wichteg Prioritéiten am Bildungsbericht 2024 sinn d’Stäerkung vun der Éducation précoce an d’Generaliséiere vun der Alphabetiséierung op Franséisch.

Wat heescht dat konkret? Et ass gewosst, dass de Vocabulaire vu Kanner am Alter vu 6 Joer staark variéiert, vu 500 bis 13.000 Wierder. Kanner mat klengem aktive Vocabulaire hunn duerno kaum Chancen op en erfollegräiche Schoulparcours, ausser et gëtt gezielt entgéint gesteiert. D’Éducation précoce stäerken bedeit eng nei Missioun fir Crèchen a Maisons relais d’Kanner sproochlech progressiv op e gudde Niveau ze bréngen. Wier et net ubruecht, spezialiséiert Personal anzebezéien, dat dëse Prozess vun Ufank un ënnerstëtzt? D’ Zil ass, si optimal op d’Alphabetiséierung op Däitsch oder Franséisch virzebereeden.

Eng weider Prioritéit vum Bericht ass den Ausbau vun ëffentlechen Europaschoulen. Dës erméiglechen et de Schüler, hir Mammesprooch als Haaptsprooch ze wielen an eng zweet Sprooch um Niveau 2, 3 oder 4 ze léieren. Et muss ee wëssen, dass fir eng Sprooch aktiv am Léierprozess ze notzen, de Niveau 2 de Minimum ass.

Europaschoule sinn attraktiv, well si de komplette Schoulparcours – Primär a Secondaire– a just 5+7 Joer ubidden, also e Joer méi séier wéi de nationale System. Och huele si Schüler am 6. Schouljoer (dem Cycle 4.2) op, déi keng Admissioun fir de klassesche Wee kruten, bereede si awer duerno nëmmen op de Baccalauréat européen vir.Misst dee System net och praktesch Bildungsweeër ubidden, elo wou d’Schülerschaft méi heterogen ass? Oder riskéieren déi Schüler, déi den Ufuerderunge vum Secondaire classique net entspriechen, hiert Gléck am Ausland sichen ze mussen?

Domat stéisst een op den zentrale Feeler a béid Systemer, dem nationalen wéi och dem europäeschen. Handwierklech Fäegkeete misste vu 6 Joer u gläichwäerteg mat Sproochen a Rechnen an de Curriculum integréiert ginn, fir esou Talenter z’erkennen a Kompetenzen z’entwéckelen. De Systemfeeler besteet doranner, dass d’Handwierk haut nëmmen als en Noutplang betruecht gëtt, wann de klassesche Wee net klappt! Dobäi misst et de Status vun enger moderner, innovativer a wäertvoller Orientatioun fir jidderee kréien.

Vill Etüde weise jo drop hin, dass d’Kombinatioun vu praktescher Manipulatioun an theoreteschem Léiere net nëmmen d’Konzentratiounsfäegkeet vu Schüler stäerkt, mee och den Unterrecht méi effizient mécht.

D’Iwwerschaffe vun de Léierpläng an dësem Sënn ass méi wéi jee néideg! Wéi laang waarde mir nach?